أسامة فوزي جورجي: مش عايزين دعم.. عايزين سعر عادل».. لماذا يدفع المصري أضعاف السعر العالمي؟
خبير استشاري في الهيدروجين والأمونيا الخضراء- مؤسس منصة هيدروجين إينتليجنس
موضوع الدعم وإن الدولة مش مسؤولة ده موضوع في غاية الأهمية!
أنا كمواطن مصري بقولها لك على بلاطة: أنا مش عايز الدولة تدعمني في أي حاجة، بس بطلب من الدولة حاجة واحدة بس.. تدخل السلع اللي بتيجي من برة بسعرها الأساسي والحقيقي!
العالم كله بيشترى موبايل سامسونج بسعر ما يعادل ٢٢ الف جم والمصنع اللى بيصنع الموبايل موجود فى المنطقة الصناعية فى كوم أوشيم ببنى سويف بيتباع فى مصر بسعر يقارب ال ٤٥ الف جم
وشاشات سامسونج وال جي فى مصانع مصرية وبتتباع فى مصر بضعف ثمنها عن السوق الحره فى مطار دبي وكنت فخور بأنها صنعت فى مصر 🇪🇬 ولكن الدولة سلبت المصريين حق امتلاك منتجاتهم بسعر عادل
والأيفون ال سعره بالخارج ٧٣ الف جم تشتريه فى مصر بسعر ١١٥ الف جم
يعني لما عربية تكون الصين بتصنعها وتصدرها وتكسب فيها وبتدفع كمان عليها ضرائب 35% وتصدرهالك بـ 7000 دولار..
تيجي تنزلها لي في مصر تدفعني فيها 18000 دولار؟! ده اسمه إيه غير إنه نصب علني؟!
يا فندم، أنت بتطالب بإلغاء الدعم؟ ماشي، بس في المقابل افتح السوق وأعمل اقتصاد حر بجد!
غسالة أوتوماتيك في الصين بـ 150 دولار، تتباع هنا بعد ما تتجمع بـ 700 دولار؟!
فرخة جاية من البرازيل بـ 20 جنيه تتباع للمواطن بـ 150 جنيه؟!
لو هتطالب بإلغاء الدعم، طالب الأول إن الأسعار اللي بيستورد بيها رجال الأعمال تكون حقيقية، وما يسيبوهومش يكسبوا 5 و6 أضعاف في السلعة الواحدة! ساعتها صدقني محدش هيطلب منك جنيه دعم!
لكن ما تجيش تقولي هشيل الدعم من المواطن، وفي نفس الوقت سايب جشع بعض التجار يمص في دم الناس زي ما هو عايز!
إحنا معندناش اقتصاد حر، إحنا عندنا اقتصاد موجه لصالح أصحاب النفوذ ورجال الأعمال.. وبنضحك على بعض!
أتحدى أي حد يجيبلي سلعة مستوردة دلوقتي، هطلعله سعرها الأصلي اللي يقل من 200% لـ 400% عن السعر اللي بتتباع بيه للناس هنا!
محمود العسقلاني (رئيس جمعية مواطنون ضد الغلاء) ….. قالها قبل كده: 4 تجار بس هما اللي محتكرين استيراد الذرة الصفراء من البرازيل.. البرازيل بتصدر طن الذرة بـ 160 دولار، يجي هنا ينزل في ميناء الإسكندرية يتباع بـ 13000 جنيه!
هو ده عدل ربنا؟! وهي دي الرقابة في دول العالم الثالث؟!
وللأسف الشديد.. محدش عنده إجابة ولا حد هيرد!
